24 წლის გიგა დაუშვილი, ოჯახი 9 თებერვლიდან ეძებდა, გარდაცვლილი იპოვეს - რა დეტალები ხდება ცნობილი
გიგა დაუშვილი სწორედ მტკვარშია პარასკევს ნაპოვნი, სავარაუდოდ ცხედარი მდინარემ გამორიყა. აქვს თუ არა დაზიანება ცხედარს, რა გახდა მისი სიკვდილის მიზეზი, ეს და ბევრი სხვა დეტალი მოგვიანებით გახდება ცნობილი. ჯერჯერობით შინაგან საქმეთა სამინისტროს მომხდარზე განცხადება არ გაუვრცელებია. ცხედარს ექსპერტიზა ჩაუტარდა და სახლშია გადასვენებული.
გიგა დაუშვილის დედა, ნათია დაუშვილი 4 დღის წინ "კვირის პალიტრისთვის" მიცემულ ინტერვიუში დეტალურად ჰყვებოდა თავისი შვილის გაუჩინარების ამბავს და ითხოვდა სამართალდამცავებს კიდევ ერთხელ დაეკითხათ გიგას ის მეგობრები, რომლებიც მასთან ერთად იყვნენ ბოლო წუთებში. მას ბევრი პასუხგაუცმელები კითხვა აქვს დღემდე, რადგან როგორც ამბობს, მისი შვილის ორი მეგობარი სულ სხვადასხვა ვერსიაზე საუბრობდა და ურთიერთგამომრიცხავ ამბავს ჰყვებოდა. დედის ეჭვებიც ბუნებრივია და იმედია ამ კითხვებს გამოძიება გასცემს პასუხს.
სოციალურ ქსელში ახლობლები ემოციებით საუბრობენ 24 წლის ბიჭზე, ბიჭზე, რომელსაც მთელი საქართველო ეძებდა.
"ხუთი წლის ვიყავი, როცა დაიბადა და იმ დღიდან ჩვენი კავშირი უცვლელია - აღარ ვიყავი დედისერთა, რასაც სულ განვიცდიდი... განსაკუთრებული იყო, ალბათ ბანალურად ჟღერს, მაგრამ ამავდროულად ყველაზე რეალურად ასახავს მის ბუნებას. არ შეეძლო, უცხოდ დარჩენილიყო - ყველას მეგობარი ხდებოდა, ყველას გულში იდებდა ადგილს. ჩემთვის კი არა მხოლოდ ძმა იყო, რაღაც სხვა იყო, "გიგა" იყო, რითაც ყველაფერი ნათქვამია. ის, ვინც მას არ იცნობდა, უნდა იცოდეს - არსებობენ ადამიანები, რომლებიც ამ სამყაროს სიყვარულისთვის, სიცილისთვის და სიკეთისთვის მოევლინენ. ის ერთ-ერთი ასეთი იყო. და რადგან ასეთი ადამიანები არასდროს ქრებიან, ის აქ არის, ჩემში, ყველა იმ მოგონებაში, სადაც თბილი შეხება და მისი ბოხი ხმა ცოცხლობს: „მარ, ჩემო ლამაზო"- წერს მისი დეიდაშვილი.
სოციალურ ქსელში წერს სტატუსს გიგას დეიდაც:
"შენზე წარსულში როგორ ვილაპარაკო დეი, დროებით, ჩემო გულის ნაწილო. შენ იცი შენ ვინ ხარ ჩემთვის, ჩვენ დეიდა-დისშვილი არ ვართ მხოლოდ, ჩვენ სულ სხვა ურთიერთობა გვაქვს, მე და შენ, შენ და მე, ასე ვიყავით და ვიქნებით სულ სანამ ვიარსებებ ამ ქვეყანაზე. მერე კი, ვიცი პირველი შენ შემომეგებები სამუდამოდ, როცა დავიდებ შენთან ბინას. მიყვარხარ უკიდეგანოდ…".
რა გახდა ახალგაზრდა ბიჭის გარდაცვალების მიზეზი, ხომ არ იყო ეს მკვლელობა, ეს და სხვა დეტალები ალბათ მალე გახდება ცნობილი. ფაქტზე გამოძიება მიმდინარეობს.
"კვირის პალიტრა" სამძიმარს უცხადებს გიგას დედას, მის ოჯახს და ახლობლებს მომხდარი ტრაგედიის გამო.
