„მამაჩემის ფოტოს ჩათიდან ჩათში დაატარებენ - რუსს, სამშობლოს მოღალატეს და რას აღარ ეძახიან...ცოტა ხნის წინ დამირეკა და მითხრა, სპეცრაზმისთვის ცოტა ასაკი აღარ მიწყობს ხელსო… " - ანუკი კანკია

ანუკი კანკია სოციალურ ქსელში მამასთან ერთად გადაღებულ ფოტოს აქვეყნებს და წერს, რომ „ტელეგრამში“ მამამისის, გოჩა კანკიას ფოტო გაავრცელეს, თითქოსდა, სპეცდანიშნულების რაზმის თანამშრომელია. 

ანუკი კანკია წერს, რომ აღნიშნული ინფორმაცია სიმართლეს არ შეესაბამება.

„გამარჯობა, პირველ ფოტოზე მე და 59 წლის მამაჩემი გოჩა კანკია ვართ. მეორე ფოტოზე, რომელიც ტელეგრამში გავრცელდა, ასევე მამაჩემი გოჩაა, თუმცა პირადობის ნომერი, დაბადების თარიღი და მამის სახელი სხვისია.
ამ ქვეყნად ცოტას ვიცნობ ისეთს, ვისაც შეიძლება მასზე ძალიან უყვარდეს სამშობლო. ჰოდა, დღეს მთელი დღის განმავლობაში მის ამ ფოტოს ჩათიდან ჩათში დაატარებენ - ხან რუსს, ხან სამშობლოს მოღალატეს და რა ვიცი კიდევ რას აღარ ეძახიან.

ცოტა ხნის წინ დამირეკა და მითხრა, სპეცრაზმისთვის ცოტა ასაკი აღარ მიწყობს ხელსო…
სამშობლოს სიყვარულის სახელით ტყუილის გავრცელება, ადამიანების შევიწროება, მტრად გამოცხადება და მსგავსი ფაშისტური მიდგომები კარგი ამბავი არ არის და იმედია ამ ჭეშმარიტებაზე ყველა ვთანხმდებით!“, - წერს ანუკი კანკია სოციალურ ქსელში.